مين بماله او بجاهه دور الريح في اتجاهه غير الـ مكتوب عليه
كلمات اغنية المقدمة للفيلم الشهير " الشك يا حبيبي " للفنانة الرائعة شاديه و الفنان القدير يحيى شاهين و الفنانة القديرة سناء جميل و الفنان القدير محمود ياسين
يا خبر كل النجوم دي في فيلم واحد و فيلم ناجح كمان ... ياترى يحيى شاهين زعل من مخرج الفيلم لانه حط اسم شاديه الاول و لا سناء جميل زعلت من شاديه عشان برضه اسمها كان الاول رغم ان سناء جميل تألقت سينمائيا و مسرحيا من فيلم بداية و نهاية امام العملاق عمر الشريف
و في افلام تانية كتيرة اوي في فترات الستينات من القرن الماضي ضمت اسماء لفنانين مش هايتكرروا تاني و الغريب ان ماكنش بينهم الخلافات الحادة اللي بتوصل لدرجة ترك الفنانة الصاعدة الواعدة المتألقة الابهة اللي مافيش زيها لاستوديو التصوير لان المخرج الصاعد الواعد المتألق الابهة برضه ناوي يحط اسم ممثلة تانية الاول
و لا ان يكون في سباق نشوف فيه مين اللي بيجيب ايرادات اكتر فلان ابن فلان و علان ابن علان خصوصا ان فلان رجع لاداء شخصيته اللي بيتهته فيها و مش بنبقى فاهمين هو بيقول ايه اللي كانت سبب في جلب المال الوفير على المنتج ملك الكبدة في مصر و اشتهر من ساعتها كمنتج غزير الفلوس
الايام دي الفن بقى نجم واحد بس يشيل الفيلم و كفاية اسمه هو اللي هايجيب الناس تتفرج على الفيلم في السينما
زمان كانت قصة الفيلم اللي بيتبارى النقاد في التحدث عنها اكتر من التحدث عن النجم هي اللي بتغلب على الاراء النقدية
دلوقتي بقى نشوف مين عمل سكسوكة و قفل زراير قميصه و لا مين لونت شعرها و لا حتى حلقته خالص
ده كان عن اهل التمثيل بتاع الايام دي اللي بيقولوا عليه تمثيل
ان شاء قريب نتكلم عن اهل المغنى
ليست هناك تعليقات:
إرسال تعليق